Deputetja e PD-së, Albana Vokshi, ka reaguar për një video që ka qarkulluar në rrjetet sociale, ku dëgjohen anëtarët e Komisionit në momentin kur po kryhet plotësimi i procesverbalit. Deputetja sqaroi se bëhej fjalë për numrin e fletëve të prodhuara, dhe jo për votuesit. Reagimi i saj vjen pas publikimit të një video mbrëmjen e së premtes, nga momenti kur anëtarët plotësojnë procesverbalin, pasi kanë numëruar fletët e votimit për kreun e Këshillit Kombëtar të PD-së. Deputetja Albana Vokshi u shpreh se procesi ishte shumë transparent, dhe videoja ku ishte prezente edhe vetë ajo, është nxjerrë nga konteksti.
“Keni filmuar, keni qenë LIVE. Keni parë se kush ka votuar. Mund t’i rikthehemi bashkë edhe videove për të numëruar gjithkënd që votoi. E theksoj që ka pasur mikrofon në vendin e votimit, është bërë numërimi i fletëve të ndara për Elnin dhe Edin, ju e kishit rezultatin e votimit.
79 dhe 132 e kishit përpara se të shpallej zyrtarisht. Një proces i tillë i qëllimshëm dhe dashakeqësi, e dalë jashtë kontekstit. Nuk është e rëndësishme, por do e shpjegoj në respekt të publikut shqiptar që na ka ndjekur.
Diskutimi për të cilin bëhet fjalë, është e shkëputur, është rreth fletëve totale të votimit që janë vënë në dispozicion të dy tavolinave të votimit, është një numër total i parëndësishëm. Madje s’ka as rubrikë për numrin total të fletëve, është i parëndësishëm. Nuk ishin informuar as komisionerët për numrin total të fletëve. Diskutimi po bëhej për këtë. Ky nuk e bën dot pis këtë proces, askush nuk e cënon integritetin e këtij procesi demokratik. Partia Demokratike është e vendosur për transparencë, pavarësisht pengesave të ndryshme që mund të hasen”, tha ajo.
