Thuhet se 1 në 5 të rritur dhe 1 në 6 fëmijë nuk kanë nivele të mjaftueshme të vitaminës D. Shumë njerëz vuajnë nga mungesa e vitaminës D duke qenë se qëndrojnë më shumë në ambiente të mbyllura. Sidomos fëmijët, të cilët tani nuk luajnë më jashtë si më parë, por qëndrojnë brenda duke luajtur me pajisjet elektronike. Kështu ndodh edhe me ne që punojmë gjatë gjithë kohës brenda, jemi më të rrezikuar nga mungesa e vitaminës D.
Më të rrezikuar janë personat me lëkurë të errët, duke qenë se sa më e errët të jetë lëkura, aq më e vështirë është sintetizimi i vitaminës D. Persona të tjerë të rrezikuar janë gratë shtatzëna dhe ato që ushqejnë fëmijën me gji, si dhe ata që mbulohen për qëllime fetare. Ky është një problem shëndetësor serioz, duke qenë se mungesa e vitaminës D për një kohë të gjatë rrit rrezikun për sëmundjet kardiovaskulare, madje edhe kancerin.
Ja cilat janë disa nga shenjat që paralajmërojnë për mungesë të vitaminës D:
Prekeni shpesh nga infeksionet
Vitamina D është shumë e rëndësishme për sistemin imunitar. Në mungesë të kësaj vitamine, qelizat imunitare e kanë të pamundur të reagojnë si duhet ndaj një infeksioni të mundshëm. Shkencëtarët po studiojnë aktualisht për rolin e luajtur nga mungesa e vitaminës D në rritjen e rrezikut për zhvillimin e kancerit, sidomos kancerit kolorektal, të gjirit, pankreasit dhe prostatës.
Jeni të stresuar – sidomos në dimër
Vitamina D luan një rol kyç në mbajtjen nën kontroll të niveleve të serotoninës në tru. Këto janë neurotransmetues shumë të rëndësishëm për gjendjen emocionale, prandaj edhe mungesa e vitaminës D lidhet me depresionin. Studimet kanë treguar se njerëzit kanë luhatje humori gjatë muajve të dimrit, duke e lidhur atë direkt me nivelet e ulëta të vitaminës D gjatë këtyre muajve.
Jeni GJITHMONË të lodhur
Vitamina D është e rëndësishme për konvertimin e ushqimit në energji. Nëse jeni gjithmonë të lodhur dhe të plogësht, mungesa e kësaj vitamine do të thotë se nuk po i merrni siç duhet lëndët ushqyese nga produktet ushqimore dhe trupi nuk është i aftë të konvertojë siç duhet ushqimet në energji kjo për shkak të mungesës së vitaminës D, shkruan Shëndeti Online.
Keni dhimbje të kyçeve ose dobësim të kockave
Vitamina D është e rëndësishme për të rregulluar nivelet e kalciumit dhe fosfatit në trup, duke luajtur kështu një rol kyç në funksionimin e kyçeve, muskujve, dhëmbëvee dhe parandaluar osteoporozën (humbja e densitetit kockor) ose osteomalacia (dobësim të kockave) me kalimin e moshës. Kur keni nivele të ulëta të vitaminës D, dobësimi i kockave mund të rrisë rrezikun e frakturave. Vitamina D është shumë e rëndësishme për absorbimin e kalciumit, një lëndë ushqyese që forcon kockat.
Ju dhëmbin muskujt
Vitamina D ndihmon në funksionimin e muskujve duke qenë se receptorët e saj janë të lokalizuara në të gjithë trupin, përfshirë edhe muskujt. Dhimbja e muskujve është shpesh shenja e parë e mungesës së kësaj vitamine. Vitamina D kalon në qelizat e muskujve, nga ku metabolizohet, duke rritur kontraktimin e muskujve, prandaj është e rëndësishme për forcimin muskujve dhe kockave nëpërmjet aktivitetit fizik.
