Banorët e zonës së 5 Majit, të Laprakës e Paskuqanit janë mbledhur sërish në protestë para Kuvendit, për të kundërshtuar projektin që shemb banesat e tyre. Nënë Liza, e cila është kthyer në banoren simbol të këtyre protestave, ka folur për mediat dhe i ka bërë thirrje qytetarëve të dalin në protestë në mbështetje të tyre.
Nënë Lizës, të cilës iu shemb banesa në “5 Maj”, kërkoi nga institucionet e drejtësisë që të lirojnë 5 banorët e arrestuar të zonës së saj, pas përplasjeve të dhunshme mëngjesin e së martës ku u shembën disa banesa.
Liza Marku tha se i biri ndodhet në burg, dhe vuan nga tensioni. Ajo u shpreh se gruaja, arma dhe shtëpia nuk i dorëzohen askujt. Po kështu apeloi ndaj popullit shqiptar, që të marrë në dorë fatin e vendit.
“I bëj thirrje shtetit e gjykatës, të na nxjerrë sa më shpejt nga burgu ata 5 persona. Gruaja, arma e shtëpia nuk i jepet asnjë njeriu, ai që i jep nuk është burrë, por njeri kot i thotë vetes njeri kot. Unë e kam djalin në burg, ai është i sëmurë, me tension.
Unë kam vajtuar në shtëpi, si mund të rrijë nëna pa birin?! Ti lirojnë të arrestuarit. As në Afganistan nuk e kanë bërë kështu. I bëj thirrje gjithë rinisë e popullit të hapë sytë e të vijë të marrë fatet e këtij vendi, se këtu veç me thonë burra shkoni kapni hujt se na ka vonë dreqi për fund. Se janë dy-tre vetë që sundojnë botën.
Mos e gëzofshnin mundin tonë e djersën tonë. Djali im s’i ka bërë me drogë e hajdutllëqe. Populli të mblidhet sa me shumë para Parlamentit, Kryeministrisë, Ambasadës Amerikane, gjykatat. Gjykata të japë drejtësinë, se mua më prishin shtëpinë e jetën”, tha Liza Marku.
Policia e Tiranës konfirmoi dje se ka prangosur 5 persona dhe ka proceduar 2 të tjerë, pasi kanë plagosur dhe kundërshtuar forcat e policisë pas prishjes së disa banesave të tjera në “5 Maj”.
