Të paktën gjashtë persona kanë humbur jetën, pasi u kapën nga një ortek i shkaktuar nga shembja e një akullnaje në Alpet veriore italiane. Zyrtarët e emergjencës thanë se nëntë të tjerë u plagosën nga shembja, me dy persona të lënduar rëndë.
Ekipet e shpëtimit duke përdorur helikopterë dhe dronë, kanë punuar gjatë natës duke kërkuar për 19 persona të zhdukur. Video e incidentit tregoi një masë akulli duke u rrëzuar në shpatet e Marmolada, mali më i lartë i zonës.
Alpinistët e plagosur, përfshirë një person të mbetur në gjendje kritike, u dërguan në disa spitale përreth zonës, thanë zyrtarët e shpëtimit. Nuk është menjëherë e qartë se çfarë e shkaktoi shembjen e pjesës së akullnajës.
Por Walter Milan, një zëdhënës i shërbimit të shpëtimit, tha për TV shtetëror se zona ka përjetuar temperatura jashtëzakonisht të larta ditët e fundit.
“Nxehtësia është e pazakontë”, tha z. Milan, duke vënë në dukje se temperaturat kanë arritur 10 gradë Celsius në kulmin e akullnajës ditët e fundit.
“Kjo është nxehtësi ekstreme”, tha ai. “Është e qartë se është diçka jonormale”.
Reinhold Messner, një alpinist italian, i tha gazetës “La Republica” se akullnaja është duke u tërhequr prej disa vitesh për shkak të ndikimit të ngrohjes globale.
“Nuk ka mbetur pothuajse asnjë akull”, tha zoti Messner. Ai vuri në dukje se akullnajat herë pas here shemben “për shkak të gravitetit”, por tha se arsyeja e tërheqjes së akullnajave “është nxehtësia globale, e cila shkakton shkrirjen e akullnajave”.
Burimi i lajmit: BBC. Përshtatur nga Tirana Today
