Toyota dhe Mazda kanë njoftuar se do të ndërtojnë një fabrikë prodhimi që do të kushtojë 1.6 bilionë dollarë në SHBA, e cila do të hapë më shumë se 4 mijë vende pune.
Prodhuesit japonezë deklaruan se fabrika do të fillojë punën e saj rreth vitit 2021, por nuk dhanë asnjë të dhënë specifike se ku do të ndërtohet fabrika.
Mazda ka në plan ndërtimin e automjeteve të reja për tregun amerikan, ndërkohë që Toyota do të prodhojë modelin e saj Corolla.
Ky veprim në një farë mënyrë konsiderohet si fitore për presidentin Trump. Ai sulmoi Toyotën vitin e kaluar, kur kompania dëshironte të ndërtonte fabrikën e saj në Meksikë. Trump kërcënoi të vendoste një “taksë të madhe kufitare” nëse fabrika nuk do të ndërtohej në SHBA, prandaj Toyota konfirmoi SHBA si destinacion përfundimtar.
Trump e ka mirëpritur lajmin, duke e cilësuar në Twitter si një investim fantastik drejt SHBA-ve.
Të gjitha Corollas që janë shitur aktualisht në SHBA, janë ndërtuar në Ontario, Kanada ose Misisipi. Mazda nuk ka prodhuar makina në SHBA që në kohën e partneritetit që kishte me Fordin, rreth një dekadë më parë.
Perspektiva e ndërtimit të një fabrike të re në SHBA mund të niste një konkurrencë midis shteteve, në lidhje me vendndodhjen e saj. Qeveritë lokale kanë gjasa të ofrojnë subvencione dhe stimuj tatimorë për të ndikuar në vendndodhjen e fabrikës, e cila mund të prodhojë deri në 300,000 automjete në vit, shkruan CNN.
Drejtuesit e Toyota kanë deklaruar se planifikohet të investohen 10 miliardë dollarë në SHBA gjatë pesë viteve të ardhshme.
