Uashingtoni është duke shqyrtuar deklaratën e Kinës se do të blejë më shumë mallra amerikane dhe do të ulë disbalancën ndërmjet të dy vendeve. Siç njofton korrespondenti i Zërit të Amerikës, Michael Bowman, gjatë bisedimeve të javës së kaluar mes negociatorëve amerikanë dhe atyre kinezë nuk u dhanë shifra konkrete nga Pekini, duke ngjallur kështu kritika nga disa ligjvënës në Uashington.
Pas muaj tensionesh në rritje tregtare mes SHBA-së dhe Kinës dhe njoftimeve për tarifa të reja dhe masa ndëshkimore, një rreze shprese u shfaq për çlirimin e tensioneve.
Këshilltari kryesor ekonomik i Presidentit Donald Trump pranon megjithatë se ende nuk është arritur një marrëveshje solide.
“Ka një komunikatë të lëshuar nga të dyja vendet, ku mund të shikohet se çfarë synohet të arrihet – një shans për rritje të madhe në nivelet e eksporteve”, thotë Larry Kudlow, drejtor i Këshillit Kombëtar Ekonomik.
Zyrtarët kinezë thonë se bisedimet janë konstruktive dhe se po vazhdojnë.
“Shpresojmë mos të kemi rritje të tensioneve tregtare SHBA – Kinë. Jemi përgatitur sigurisht për të gjitha opsionet”, deklaroi Gao Feng, zëdhënës i Ministrisë kineze të Tregtisë.
Sidoqoftë, Presidenti Trump ka vazhduar retorikën e tij për tregtinë.
“Shtetet e Bashkuara kanë dalë me humbje të mëdha nga vite të tëra marrëveshjesh të këqija tregtare. Nuk fajësoj Kinën. Fajësoj udhëheqjen amerikane të viteve të mëparshme. Kina ka përfituar në kurrizin tonë – një evakuim i pasurisë që nuk është parë kurrë më parë”, shprehet Presidenti Trump.
Kreu i demokratëve në Senat, Chuck Schumer, një kritik i zëshëm i praktikave tregtare të Kinës, nuk u impresionua. Nëpërmjet Twitter-it, Senatori Schumer i tha Presidentit Trump mos ta lejojë Kinën që ta vërë në lojë, duke shtuar se blerjet afatshkurtra të mallrave amerikane nga Kina, nuk duhet të shërbejnë që SHBA-ja të ulë kërkesat që Pekini të ndalë vjedhjen e pronësisë intelektuale amerikane, shkruan voa.
Duke folur për kanalin Fox News, Sekretari i Thesarit Steve Mnuchin tha se Shtetet e Bashkuara dhe Kina kanë rënë dakort të pezullojnë vendosje tarifash të reja, derisa të bihet dakort për një kuadër të qartë marrëveshjeje.
