Një bilanc negativ është shënuar pas sulmit në redaksinë e “Capital Gazette”, në Maryland të SHBA-së, ku numërohen pesë persona të vdekur. Ngjarja e rëndë u raportua dje, ku një person ka shtënë me armë zjarri në zyrat e redaksisë së gazetës. Siç shkruajnë mediat e huaja, shumë prej të pranishmëve ishin fshehur poshtë tavolinave të punës, deri në momentin që u ndalën të shtënat.
Arrestimi i agresorit
Policia ka bërë të mundur prangosjen e agresorit, por ende mbeten mister shkaqet që e kanë shtyrë atë, të sulmojë me armë redaksinë e “Capital Gazette”.
Phil Davis, një reporter i kësaj gazete ka konfirmuar të shtënat ndaj disa personave, pa dallim, ndërsa hetuesit thonë se agresori ka vepruar i vetëm.
“Capital Gazette” zotërohet nga grupi mediatik “Baltimore Sun”, me pronarë më të mëdhenj “Tronc Inc”. Policia është urdhëruar gjithashtu të kontrollojë dhe sigurojë edhe mjediset redaksionale të “Baltimore Sun”.
“Capital Gazette” është një e përditshme e shtypit të shkruar në qytetin Annapolis të Marylandit, ndërsa gazeta e saj simotër, “Maryland Gazette” është një prej më të vjetrave amerikane.
