Presidenti Donald Trump është duke u hetuar nga avokati special, Robert Mueller për pengim të mundshëm të drejtësisë, raportojnë mediet amerikane.
Ato thonë se zyrtarët e lartë të inteligjencës do të pyeten, nëse Trump u përpoq t’i japë fund një hetimi ndaj këshilltarit të tij të shkarkuar të sigurisë kombëtare, në lidhje me shkarkimin e shefit të FBI James Comey.
Presidenti Trump ka mohuar në mënyrë të përsëritur çdo bashkëpunim me Rusinë, duke cilësuar hetimin në vazhdim si një “gjueti shtrigash”.
Washington Post tha se vendimi i Mueller për të hetuar sjelljen e vetë Presidentit Trump, është një pikë kthese e madhe në hetim, e cila deri kohët e fundit u përqendrua në këndin rus.
Pse po hetohet presidenti?
Raportet e fundit të medies thonë se pengimi i hetimit të drejtësisë, filloi vetëm disa ditë pasi Presidenti Trump largoi Comeyn, më 9 maj.
Comey dëshmoi për Kongresin javën e kaluar se Trump i kishte bërë presion që ai të mos hetonte ish-këshilltarin e Sigurisë Kombëtare, Michael Flynn.
A është Trump më afër pengimit të drejtësisë?
Flynn u shkarkua në shkurt sepse nuk zbuloi shtrirjen e kontakteve të tij me Sergei Kislyak, ambasadorin rus në Uashington.
Comey dëshmoi nën betim se, Trump i kishte thënë gjatë një takimi privat: “Shpresoj ta lësh Flynn të shkojë, ai është një djalë i mirë”.
Shtëpia e Bardhë ka thënë se presidenti “kurrë nuk i ka kërkuar z.Comey apo ndonjë tjetër të përfundojë ndonjë hetim, duke përfshirë çdo hetim që përfshin Gjeneralin Flynn”./BBC/ Tirana Today/
