DASH u ka kërkuar shtetasve amerikanë që të shmangin udhëtimet në Evropë. Paralajmërimi vjen për shkak të rrezikut nga sulmet terroriste, ndërsa në njoftim Departamenti Amerikan i Shtetit përmend incidentet në Francë, Rusi, Suedi dhe Mbretërinë e Bashkuar.
Në njoftim thuhet se Shteti Islamik dhe Al Kaida “kanë kapacitete për të planifikuar dhe ekzekutuar sulme terroriste në Evropë”, pavarësisht operacioneve të vazhdueshme të qeverive lokale në luftën kundër terrorizmit.
“Terroristët pritet të përdorin taktika të njohura, siç është sulmi me armë zjarri, me eksploziv, thika apo objekte të mprehta që i shmangen sigurimit, apo duke i shndërruar kamionët apo automobilat në armë e duke u turrur mbi njerëz. Shtetasit amerikanë që udhëtojnë në apo përmes Evropës inkurajohen të kontrollojnë ueb-faqet e ambasadave apo konsullatave të tyre e po ashtu të mbledhin informata lokale të sigurisë nga zyrtarët”, shton më tej deklarata.
“Paralajmërimi për udhëtimet” pritet të mbetet në fuqi edhe për katër muajt e ardhshëm, deri më 1 shtator.
