Samantha Power, kreu i Agjencisë Amerikane për Zhvillim Ndërkombëtar (USAID), ka njoftuar një investim prej 55 milionë dollarësh në infrastrukturën e ngrohjes të Ukrainës, ndërsa vendi i shkatërruar nga lufta po përgatitet për një dimër të zymtë.
“Kjo ndihmë do të mbështesë riparimet dhe mirëmbajtjen e tubave dhe pajisjeve të tjera të nevojshme për të ofruar ngrohje në shtëpi, spitale, shkolla dhe biznese në të gjithë Ukrainën”, sipas një deklarate të USAID.
“Nga ndihma e re e USAID-it do të përfitojë drejtpërdrejt deri në shtatë milionë ukrainas në 19 rajone”, tha ajo.
“USAID do të sigurojë gjithashtu gjeneratorë të energjisë dhe burime alternative të karburantit për spitalet, qendrat për personat e zhvendosur brenda vendit dhe strehimoret për qytetarët e cenueshëm social, duke ndihmuar në sigurimin e ukrainasve me qasje në strehimore të ngrohta gjatë dimrit. Ndihma do të synojë pjesë të Ukrainës që janë shkatërruar nga lufta e Putinit, duke përfshirë rajonet e Chernihiv, Kharkiv, Kiev, Mykolaiv, Odesa, Zaporizhzhya dhe Zhytomyr”, shtohet në deklaratë.
Power mbërriti në kryeqytetin ukrainas të enjten, për të takuar një sërë qytetarësh, tha Ambasada e SHBA në një postim në Facebook.
Administrata Biden është shfaqur si një aleat i vendosur i Kievit, pasi Moska filloi sulmin e saj ushtarak ndaj Ukrainës në fillim të këtij viti. Që nga fillimi i pushtimit rus në fund të shkurtit, SHBA-ja ka dhënë më shumë se 16 miliardë dollarë ndihmë për sigurinë për Ukrainën.
Javën e kaluar, Pentagoni njoftoi 1.1 miliardë dollarë ndihmë ushtarake shtesë për Ukrainën, të cilën një zyrtar i lartë i mbrojtjes e quajti një “investim shumëvjeçar” në mbrojtjen e vendit.
Burimi i lajmit: CNN. Përshtatur nga Tirana Today
