Teuta dhe Partizani kanë dhuruar spektakël në “Niko Dovana” për t’iu gëzuar në fund një pike mes shiut dhe sherrit në fushë. Një sfidë që nuk zhgënjen dhe konfirmon dy skuadrat më në formë të momentit në kampionatin shqiptar. Barazimi 1-1 ishte edhe meritë e dy portierëve respektivë të cilët kanë bërë pritje të jashtëzakonshme.
Alban Hoxha mposhtet në minutën e tetë nga Gashi, që shndërron në gol me kokë, një top që i erdhi nga goditja e këndit. Festa është për “Djemtë e Detit”, që si kurrë më parë kanë mbushur shkallët e “Niko Dovanës”.
Më pas loja është e gjitha për tu shijuar, ndërsa reshjet e shiut shtojnë dhe më tepër vështirësitë në fushë, lojtarët shtojnë tensionin mes tyre. Në minutën e 24 është Osmani që përplaset me Hilën, duke e kapur këtë të fundit prej fyti, ndërsa mesfushori i Partizanit e godet me grusht në bark.
Isli Hidi do të mposhtej vetëm pjesën e dytë, pas një super aksioni të Asanit në minutën e 60-të Baraspeshë në fushën e lojës, ndërkohë që të dyja ekipet tashmë hedhin sytë nga kundërsulmet.
Partizani sërish me Asanin ka një tjetër mundësi të shkëlqyer për të shënuar, por Isli Hidi bën mrekullinë teksa shpëton portën. Më pas është radha e Alban Hoxhës teksa shpëton portën në minutën e 73-të nga një gol i sigurt i durrsakëve.
Partizani do të luajë kundër Kukësit në ndeshjen e ardhshme, ndërsa Teuta ndaj Kastriotit. Barazimi i sotëm e lë Partizanin kryesues me 35 pikë, ndërsa Teuta vijon në vendin e katër me 29 pikë, një më pak se Skënderbeu dhe Kukësi që ndajnë vendin e dytë dhe të tretë me 30 pikë.
