Kërkesa e Hashim Thaçit ndaj presidentit Meta për pajisjen e shtetasve kosovarë me pasaporta shqiptare ka shkaktuar reagime të shumta.
Analisti i njohur amerikan për Ballkanin, Daniel Serwer ka deklaruar se pajisja e qytetarëve të Kosovës me pasaporta të Shqipërisë do ta zvogëlonte sovranitetin e Kosovës.
Në një interviste për gazetën “Zëri” analisti Serwer tha se pavarësisht një kërkese të tillë Shqipëria nuk do t’u japë pasaporta kosovarëve, siç thotë ai, nga frika e kthimit mbrapa të perspektivës së vet për në Bashkimin Evropian.
Gjithashtu, Serwer foli edhe për kritikat e Thaçit ndaj ndërkombëtarëve për Gjykatën Speciale.
Sipas tij, nëse UÇK-ja dëshiron të mbahet mend për të mirë mbështetësit e saj nuk duhet t’i mbrojnë abuzimet e të drejtave të njeriut të kryera nga anëtarët e saj.
I pyetur nëse Serbia do të detyrohet ta njohë pavarësinë e Kosovës në këmbim të anëtarësimit për në BE, Serwer ka thënë se njohja duhet të ndodhë edhe më shpejt:
“Ajo nuk duhet të jetë njohje dypalëshe, por në vend të kësaj mund të vijë në formën e anëtarësimit në OKB dhe shkëmbimin e përfaqësuesve diplomatikë të nivelit të ambasadorëve”, ka thënë mes tjerash Serwer.
