Seria A rezervon përballje mjaft të bukura këtë fundjavë, duke filluar nga e shtuna që do të ketë dy superndeshjet, derbin e Romës dhe përballjen Napoli-Milan. Derbi i zjarrtë do të jetë më i bukuri në vitet e fundit pasi të dyja ekipet vijnë nga një formë e jashtëzakonshme. Thomas Strakosha, portieri i kombëtares shqiptare, do të jetë në portën e Lacios edhe pse vjen nga një dëmtim i lehtë që nuk ka rezultuar fatal për këtë ndeshje që cilësohet si më e rëndësishmja e vitit.
Trajneri Inzaghi e ka projektuar titullarë Srakoshën në formacionin 3-5-1-1 ku në mbrojtje do të vendosen Bastos, De Vrij dhe Radu, në mesfushë, nga e djathta në të majtë, Marusic, Parolo, Milinkovic-Savic, Lucas Leiva dhe Lulic, ndërsa në sulm Luis Alberto pas të avancuarit Immobile. Në krahun tjetër, Di Frencesco i beson rreshtimit sulmues 4-3-3, me Allison në portë, Florenzi, Fazio, Manolas dhe Kolavor në mbrojtje, Nainggolan, De Rossi dhe Strootman në mesfushë, ndërsa në vijën e parë Perroti, Dzeko dhe El Shaarawy.
Një futbollist shqiptarë do të jetë në fushë edhe në sfidën e mbrëmjes së të shtunës mes Napolit dhe Milanit. Është Hysaj që edhe pse u impenjua për 90 minuta në ndeshjen që kishte kombëtarja me Turqinë, mbetet zgjedhja e parë e teknikut Sarri. Albiol, Kulibaly dhe Mario Rui do të plotësojnë prapavijën, me Reinan që nuk ndryshon në portë. Në mesfushë Allan, Jorginho dhe Hamsik, ndërsa në vijën e parë Callejon, Mertens dhe Insigne. Montella pritet t’i përgjigjet Sarrit me një 3-4-2-1. Donnarumma në portë, Rodriguez, Romagnoli dhe Bonucci në mbrojtje, Abate, Kessie, Montolivo dhe Borini në mesfushë, ndërsa dyshja Bonaventura-Susso në mbështetje të Kalinic.
