Me një gol nga Ronaldo (i cili humbi dhe një penallti) dhe një dopietë nga Kuadrado, Juventusi vazhdon garën për t’u kualifikuar në Champions League. Goli i Lukakut dhe autogoli i Kielinit ishin të pamjaftueshëm. Bentankur dhe Brozovic dolën me karton të kuq.
Juve shënoi një fitore shumë të rëndësishme për të mbajtur gjallë shpresën për kualifikim në Ligën e Kampionëve. Dhe e arriti (me rezultatin 3-2) kundër kampionit të sapo-shpallur italian, Interit.
Skuadra e Pirlos fitoi me një performancë karakteri më shumë sesa cilësie: me një lojtar më pak arriti të gjejë mënyrën për të mbajtur të hapur mundësinë për të luajtur në Ligën e Kampionëve në shtator.
Ishte ndeshja e Var-it, i cili e ndihmoi shumë arbitrin Kalvarese. Të tre pikët e Juventusit u nënshkruan nga Ronaldo dhe një dopietë nga Kuadrado (një me penallti)teksa Interi shënoi me Lukakun (tjetër penallti) dhe përfitoi nga një autogol i Kielinit për barazimin momental. Shumë pak për të ndalur ritmin e bardhezinjve. Pati shumë ndryshim në motivim midis dy ekipeve.
Juve kalon kështu në renditje Napolin (i cili do të luajë nesër kundër Fiorentinës) me dy pikë dhe gjendet në vendin e katërt me pikë të barabarta me Milanin. Lufta për Champions League-n është ende e hapur.
