Prej një kohe të gjatë njihen marrëdhëniet e mira të Serbisë me Rusinë. Serbia kërkon të behët pjesë e BE-së por nuk pranon udhëzime për t’u shkëputur nga Rusia. Pak kohë më parë presidenti Aleksandër Vuçiç tha se askush nuk mund të imponojë Serbinë se më kë duhet të mbajë aleancë ushtarake. Vuçiç tha se Serbia është një shtet neutral nga perspektiva ushtarake. Ndërkohë, sipas sondazheve të fundit është rritur numri i Serbëve pro BE-së dhe NATO-s.
Kryetari i Ligës Socialdemokrate të Vojvodinës, Nenad Çanak, deklaroi se Serbia e ka vendin në NATO dhe se nuk duhet të shndërrohet në provincë ruse e rrethuar me vende të aleancës.
Ai në një deklaratë për media tha se nuk dëshiron të jetë pjesë e politikës, e cila miteve iu jep përparësi në raport me realitetin, në mesin e të cilave është edhe ai se “Kosova nuk është e pavarur”, por edhe për disa çështje të hapura me të cilat Serbia po përballet dhe nuk po gjejnë zgjidhje.
“Serbia është braktisur nga më shumë se 300 mijë të rinj, ndërsa ata që qëndrojnë po zhvendosen në qytete të mëdha në kërkim për vende pune, më së shumti në Beograd. Serbia nuk ka nevojë për daulle të luftës, por paqe në rajon dhe Evropë“, ka thënë Çanak.
