18 vite pasi NATO ia vendosi kufijtë me bomba, mëma e ish-Jugosllavisë, Serbia, gjendet sot e rrethuar nga shtetet anëtare të Aleancës ushtarake më të fuqishme në botë.
Një hartë e publikuar në mediet serbe, flet qartë për inferioritetin që ndjen sot Serbia përballë fqinjëve me potencialin ushtarak të barabartë me çdo vend tjetër anëtar në NATO-s.
Dhe kur inferioritetin kërkon ta shesë si krenari, kjo është akoma më e dhimbshme për Serbinë në sytë e botës, e sidomos të fqinjëve të saj.
Serbia e cila deri sot e ka parë NATO-n si armikun kryesor, është përbetuar që nuk do të bëhet kurrë pjesë e saj, por e mbetur në vetminë e madhe, nuk është çudi që të zbusë gradualisht qëndrimin.
Si pjesë e një rajoni, të konsideruar edhe nga ekspertë botëror të gjeopolitikës si “Ballkani, fuçia e barutit”, padyshim që Serbia nuk ndjehet më e sigurt. Në rast të një konflikti të armatosur të mundshëm në Ballkan, Serbia do të kuptonte që gabimi fatal i saj ishte, refuzimi i NATO-s.
Rumania, Hungaria, Kroacia, Sllovenia, Shqipëria dhe së fundi Mali i Zi, janë shtetet anëtare të NATO-s, në afërsi të Serbisë, ndërkohë që pjesë e saj pritet të bëhet edhe Maqedonia, nëse zgjidh çështjen e emrit me Greqinë./Tirana Today/
