Diplomati Fatos Tarifa shprehet se marrëveshja për “mini-Shengenin ballkanik” është më shumë në interes të Serbisë, se sa në favor të vendeve të tjera të rajonit.
Teksa ishte i ftuar këtë mbrëmje në emisionin “Arena”, Tarifa theksoi se mos të befasohemi nëse Serbia bëhet një ditë pjesë e BE-së, edhe pa e njohur pavarësinë e Kosovës.
“Nuk shoh ndonjë lidhje të drejtpërdrejtë, mund të jetë një përpjekje për të justifikuar dështimet e derisotme, por është një çështje krejt tjetër. Unë di të them se, kjo marrëveshje është më shumë në interes të Serbisë, se sa në interes të vendeve të tjera.
Si vendi që ka nisur negociatat me BE, si vendi që do të hyjë në BE para nesh, edhe pse Serbia bëri 3 luftëra të mëdha në Ballkan, Serbia është e dashura e Europës, Jugosllavia ka qenë e dashura e Europës. Nostalgjia për Jugosllavinë është ende e gjallë. Mos të çuditemi, kur një ditë, edhe pa e njohur Kosovën, Serbia mund të bëhet pjesë e BE, do të gjendet një mënyrë”, komentoi Tarifa.
