Stadiumi ‘Partizan FK”, do të presë një ndeshje mjaft delikate, ku do të presë Skënderbeun në ndeshjen e raundit të katër në Europa League. Për të mos u përsëritur ngjarjet e tre viteve më parë në përballjen Serbi-Shqipëri, janë marrë masa të shumta sigurie. Numri i policëve që do të vëzhgojnë në stadium do të arrijë në 1500, pa përmendur civilët dhe kamerat e sigurisë. Nga ana tjetër edhe klubi i Partizanit u ka bërë disa herë thirrje tifozëve të tyre për tu treguar të qetë dhe të mos ketë thirrje raciste, pasi mund të ndëshkohet ekipi i tyre dhe kjo do të rëndonte shumë. Milos Vazura drejtori i klubit të Partizanit të Beogradit, ka folur për sigurinë e kësaj ndeshjeje dhe garanton siguri maksimale.
“Policia ka marrë masat për çdo gjë edhe për dronët. Ata kanë mjetet e tyre dhe në rast se ndodh diçka atëherë mund ta rrëzojnë. Por, bashkëpunojmë ngushtë me policinë dhe numri i atyre që do të garantojnë rendin është 1500, pa harruar civilët apo edhe forcat speciale. Shpresoj që të mos kemi probleme”, ka thënë Vazura.
Forcat e shumta të sigurisë, si dhe kamerat vëzhguese do të bëjnë të mundur identifikimin e personave problematikë dhe nxjerrja e tyre jashtë stadiumit do të jetë në kohë rekord. Vëmendjen më të madhe e kanë tërhequr tifogrupi “Grobari”, të cilët janë shumë të zjarrtë dhe ka bërë që të ndëshkohet disa herë klubi i tyre, për këtë arsye vëmendja e tyre do të bjerë mbi ta.
“Nëse do të ketë kore ofenduese, kamerat do të zbulojnë menjëherë identitetin e shkelësve dhe tifozët brenda 5 minutash do të nxirren jashtë”, tha Milosh Vazur, drejtor i përgjithshëm i Partizanit të Beogradit.
Grupi i tifozëve “Grobari” që në serbisht nënkupton “Varrmihësit” janë ftuar që të shmangin incidentet, pasi nëse këto ndodhin me siguri do të bënin që UEFA ta dënonte përsëri klubin e “bardhezinjve”.
