Deputeti Eduard Selami, ndryshe nga të përjashtuarit e tjerë nga listat e kandidatëve për deputetë të PD-së, nuk ka shfaqur asnjë qejfmbetje për mospërfshirjen e tij. Edhe pse pritej të ishte përkrah deputetëve të tjerë në reagimet e tyre mbi përbërjen e listave, Selami është shfaqur me një qëndrim tjetër.
Me anë të një postimi në profilin e tij në Twitter, Selami apelon për punë, teksa deklarohet në mbështetje të listave.
“Koha per fushate, jo per analiza. Lista ka mbeshtetjen time. Suksese!”, shkruan ai.
Ndërkohë të pakënaqur dhe kritik ndaj listave, janë deklaruar disa deputetë, si Jozefina Topalli, Arben Imami, Astrit Patozi, Majlinda Bregu, etj.
Madje Topalli e Imami, gjatë një konference të përbashkët për media, nuk nguruan t’iu kërkojnë forumeve drejtuese shkarkimin e Lulzim Bashës nga kreu i PD-së, me arësyetimin se po shkatërron partinë.
