Sekretari i Përgjithshëm i OSBE, Thomas Greminger, ka apeluar ndaj klasës politike që të angazhohen për zgjidhjen e krizës. Në një konferencë për mediat, së bashku me ministrin në detyrë për Punët e Jashtme, Gent Cakaj, Greminger tha se që të bëhen përparime në këtë drejtim, duhet të angazhohen të gjithë aktorët politikë për institucionet demokratike.
Ai mbetet me shpresë se ngërçi që ka kapluar vendin, do të kapërcehet sa më shpejtë, dhe se zgjidhja arrihet me anë të dialogut. Sekretari i Përgjithshëm i OSBE, ka nënvizuar ndër të tjera se për të arritur progres, të gjithë aktorët politikë duhet të angazhohen për një mision të vetëm.
“Ne i ndjekim zhvillimet politike në Shqipëri, shpresojmë që ngërçi të kapërcehet së shpejti. Besoj se zgjidhja duhet të gjendet brenda për brenda, ajo që bëjmë ne inkurajojmë dialogun. Që të bëjë përparime duhet të angazhohen të gjithë aktorët politikë, për institucionet demokratike.
Pjesëmarrja në institucionet demokratike është rruga e vetme legjitime për të patur fuqi e influencë politike. Dialogu duhet të jetë duke respektuar Kushtetutën dhe institucionet legjitime.
OSBE është e gatshme për të ofruar mbështetje, por asnjë zgjidhje e qëndrueshme nuk ndodh nëse nuk përfshihen të gjithë aktorët politikë”, u shpreh ai.
