Komisioni i Çështjeve Ligjore ka miratuar kandidaturën e Besnik Dervishit në postin e Komisionerit për të Drejtën e Informimit dhe Mbrojtjen e të Dhënave. Mazhoranca socialiste e ka votuar, por nuk kanë munguar edhe batutat pas sulmeve të njëpasnjëshme nga ana e PD-së.
Kryetari i Komisionit të Ligjeve, Ulsi Manja tha se Dervishi është kandidatura e vetme që plotëson kriteret, dhe se dokumentacioni i tij është i plotë.
“Dervishit i ka mbaruar mandati në korrik. Pas thirrjes së Këshillit të Ministrave, kandidatura e vetme ka qënë kandidatura e Dervishajt për një mandat të dytë. Dervishaj plotëson kriteret, dhe dokumentacioni i tij është i plotë”, tha Manja.
Por kundrejt deklaratës së tij, menjëherë ka reaguar Bashkim Fino, i cili ka pyetur Dervishajn, nëse ka probleme me ligjin, pasi në të kundërt menjëherë në sulm do të hidhet PD-ja.
Bashkim Fino: A jemi në rregull me formularin e dekriminalizimit, se mos na del gjë nga këta të PD.
Besnik Dervishaj: Unë mbaj përgjegjësi të plotë për çfarë kam plotësuar në formular.
