Roma pëson një disfatë në “Olimpico” nga Torino, duke e eliminuar nga Kupa e Italisë që në raundin e 1/8 me rezultatin 2-1. Një goditje mjaft e rëndë për romanët e Eusebio Di Francescos që pas pak ditësh kanë një përballje mjaft të rëndësishme në kampionat, përballë Juventusit. Tekniku i Romës kishte lënë në stol shumë titullarë për t’u dhënë hapësira lojtarëve që kishin luajtur më pak deri në këtë fazë të sezonit, megjithatë në këtë aspekt nuk bënte përjashtim as Torino pasi edhe serbi Mihajlovic kishte bërë shumë ndryshime në formacion, ku spikaste aktivizimi në portë i vëllait të mesfushorit të Lazios Milinkovic-Savic, Vanja i cili mori një rol protagonisti në suksesin e miqëve.
Torino mund të përballet me Juventusin në fazën çerekfinale. Rezultatin e zhbllokoi mbrojtësi De Silvestri në minutën e 39-të, ndërkohë që goli i Edera në pjesën e dytë vrau shpresat e Romës për të avancuar më tej. Por kryeqytetasit mund të riktheheshin në ndeshje në të 77-tën nëse Dzeko i ardhur në fushë nga stoli nuk do ishte ndalur nga Milinkovic-Savic nga pika e bardhë e penalltisë. Goli i parë i çekut Patrick Schik me fanellën e Romës në minutën e 84-t ishte i pamjaftueshëm për verdhekuqtë pasi deri në fund Torino mbrojti avantazhin duke siguruar biletën e çerekfinaleve.
