Ishulli i Sazanit, prej katër ditësh është në ‘luftë’ me flakët. Greqia që i është përgjigjur kërkesës për të sjellë avion tip Canadair CL 415 për shuarjen e zjarrit në Sazan. Kështu bën me dije Ministria e Mbrojtjes, duke shtuar se ekspertët vlerësuan se është e nevojshme ndërhyrja nga ajri, por thelbësore mbetet puna e forcave në terren.
“Për këtë qëllim një avion tip Canadair CL 415 që vjen nga Greqia aktivizohet sot, herët në mëngjes për shuarjen nga ajri të zjarrit në ishullin e Sazanit. Avioni Canadair CL 415 do të hyjë në operacion për shuarjen e zjarrit nga ajri si mbështetje e Mekanizmit të Mbrojtjes Civile të Bashkimit Europian, Emergency Response Coordination Centre (ERCC), pas kërkesës së bërë nga Agjencia Kombëtare e Mbrojtjes Civile. Greqia iu përgjigj menjëherë pozitivisht kërkesës së Shqipërisë”, thuhet në njoftimin e Ministrisë së Mbrojtjes.
Gjatë orëve të fundit ka lindur një debat për mos marrjen e masave nga autoritetet për shuarjen e zjarreve. Një ditë më parë, Ministria e Mbrojtjes sqaronte se FA disponojnë dhe kanë në gatishmëri mjetet e nevojshme fluturuese, të parashikuara për përdorim në përmbushje të detyrave e operacioneve që duhet të kryejnë edhe në raste emergjencash si zjarret.
Sa i përket helikopterëve Cougar që thuhet se janë në servis, Ministria e Mbrojtjes bën me dije se disa prej tyre kanë kaluar procesin e mirëmbajtjes dhe ndodhen në Shqipëri.
