Shqipëria do të përballet në datën 6 tetor dhe 9 tetor me 2 nga skuadrat më të forta të botës, Spanjën dhe Italinë. Të gjithë shpresojnë te një mrekulli, që do e rriste ndjeshëm imazhin e Shqipërisë në arenën Europiane.
Në lidhje me këto dy takime prestigjoze ka folur edhe ish-ylli i futbollit europian dhe i Milanit, Dejan Saviçeviç. I pranishëm në Tiranë si President i Federatës të Malit të Zi, për të ndjekur përfaqësuesen e 19-vjeçarëve përballjen me Norvegjinë. Në një prononcim për “Top Channal” Saviçeviç është i bindur se ish-shoku i skuadrës tek Milani, Kristian Panuçi, do t’ia dale.
“Fola pak edhe me Presidentin e federatës tuaj, Duka dhe po më tregonte për dy ndeshjet e radhës që do të luajë Shqipëria kundër Spanjës dhe Italisë. Do të jenë dy ndeshje shumë të vështira nisur edhe nga fakti që keni shumë mungesa për shkak dëmtimesh dhe kartonash.
Mendoj se duhet të jeni me shumë fat që të arrinin të merrnin rezultat. I uroj shumë fat Kristian Panuçit pasi është një miku im. Mendoj që ai do t’ia dalë të bëjë një punë të mirë me përfaqësuesen tuaj. Ai është një njeri me shumë eksperiencë si futbollist dhe ka punuar si zëvendës i Kapelos tek përfaqësuesja ruse. Për këtë mendoj që ka goxha eksperiencë për të bërë mirë”, u shpreh Saviçeviç.
