Kryeministri Edi Rama është takuar sot me banorët e Finiqit, në Sarandë, ku ka shpërndarë lejet e legalizimit.
Gjatë fjalës së tij, Rama shkëmbeu batuta me qytetarët si dhe nuk ngurroi të ironizonte Vangjel Dulen, i cili sipas tij, ka ikur në drejtim të paditur pasi ia ka marrë shejtani mendjen:
“Vettingu që i ka futur në çadër, nuk e di ca dreqin do Vangjeli në çadër. Shën Vangjeli nuk është sot. Po ca bën Vangjeli në çadër?
Gjumë nuk fle ai se unë e njoh e kam dhe mik po na ka ikur në drejtim të paditur. Vetëm ju të kishës mund ta fusni në rrugën e duhur, ia ka marrë mendjen shejtani”.
Gjithashtu, kryeministri nuk harroi të përmendte “kohën e Saliut, kur tokat shiteshin pa letra”, si dhe kërkoi që të nxirrnin shejtanin nga gjykata.
“Shumë njerëz mendojnë se këto leje janë thjesht për të regjistruar shtëpinë që të mos ua prishi njeri. Nuk është kjo e vërteta, sepse shtëpitë nuk do ua prishi kush.
Për ne ky proces legalizimesh është një proces që të bëjmë shtet, që njerëzit të ndjehen të qetë për investimet e tyre dhe është një proces që t’i japin një shtysë ekonomisë familjare.
Nëse dikush ka një shpi dhe ka një biznes të vogël me lejen e legalizimit, mund ta zgjerojë biznesin e tij sepse banka e njeh. Mirëpo këtu u ndërtua një shtet që vetëm shtet nuk ishte.
S’e harroj asnjëherë, isha rrugës për në Lezhë, dhe ishte një tabelë ku shkruhej: Shesim tokë pa letra. Vetëm Saliu mund të bëjë shtet pa letra.
Ju e dini shumë mirë se si prona që t’ka lënë stërgjyshi mund të të iki nga duart se del një gjykatës, dreqi e di se kush del dhe e merr, por në fakt dreqi është në gjykatë. Duhet të nxjerrim shejtanin nga gjykata.”
Gjithashtu, Rama ka shkëmbyer batuta me qytetarët, njërin prej të cilëve e vë shumë në siklet pas një “urdhri” që i jep:
BATUTAT ME QYTETARËT:
Qytetari 1: Ju uroj suksese, lart e më lart.
Rama: Më lart nuk ka, 1 e 98 boll është.
Qytetari 2: Të falendëroj zoti kryeministër. Po kam edhe një kërkesa, na duhen tokat e kishave.
Rama: Po prit se Zoti për 7 ditë e ndërtoi tokën, tani edhe neve s’mund të bëjmë gjithçka me 4 vjet.
Qytetari 2: Po ju duhen edhe 4 vjet.
Rama: Këtë e ke në dorë ti, çoji një fjalë Perëndisë të na japë një ndihmë.
Qytetari 3 (Afrohet të marrë lejen).
Rama: Hajde merre se të ka lënë babai gati. Akoma s’të ka dalë gjumi. Mere mikrofonin, kthehu nga kamera dhe falendëro babain.
Qytetari 3: E falendëroj në shpi.
Rama: Lërë në shpi, po falendëroje këtu se t’i ka dhënë të gjitha gati. Shif te kamera dhe falendëroje!
Qytetari 3: Nuk e bëj dot. / Tirana Today
