Për gati 20 vjet, Roman Abramovich e çoi Chelsean nga një klub në periferi të elitës, në një superfuqi të futbollit global. Por pushtimi rus i Ukrainës ka rezultuar në një fund të papritur të mbretërimit të tij.
Konflikti i përgjakshëm në Ukrainë dhe zemërimi ndërkombëtar për pushtimin e Rusisë, vendosën një fokus të ri te Abramovich dhe pronësia e tij mbi Chelsea.
Është një fokus që ka hedhur dritë mbi fërkimin rrëqethës midis sportit dhe politikës: Abramovich, pronari i futbollit që realizon ëndrrat, i adhuruar nga shumica e tifozëve të Chelsea – kundrejt Abramovich oligarkut rus.
Ndikimi i sanksioneve/Pas fillimit të luftës, ndërsa Perëndimi u përgjigj duke vendosur sanksione ndaj Rusisë dhe oligarkëve të saj, asetet e Abramovich – përfshirë Chelsea – dukeshin gjithnjë e më të cenueshme ndaj një mjedisi financiar më ndëshkues dhe ai shpejt njoftoi planet e tij për të shitur klubin.
Megjithatë, përpara se të përfundonte shitja, qeveria e Mbretërisë së Bashkuar njoftoi se Abramovich do t’i nënshtrohej sanksioneve si një nga “oligarkët më të pasur dhe më me ndikim të Rusisë, perandoritë e biznesit, pasuria dhe lidhjet e të cilit janë të lidhura ngushtë me Kremlinin”.
Çfarë do të thotë kjo për Chelsean? Klubi do të jetë disi i mbrojtur nga sanksionet, i lejuar të vazhdojë të përmbushë ndeshjet e tij nën një licencë të veçantë.
Por kjo do të thotë që Chelsea nuk është në gjendje të shesë mallra ose bileta për ndeshjet e ardhshme, të angazhohet në tregun e transferimeve ose të lëshojë kontrata të reja për lojtarët, ndërsa është nën pronësinë e Abramovich.
Burimi i lajmit: CNN. Përshtatur nga Tirana Today
