Zëvendës ministri i Brendshëm, Sandër Lleshi ka nisur dhënien e urdhrave, sapo ka mbërritur në postin e dhënë nga kryeministri Rama.
Pas urdhrit për ndalimin në mënyrë të rreptë të frekuentimit të kafeneve, Lleshi ka lëshuar një tjetër urdhër të prerë për drejtuesit e Policisë së Shtetit.
Në këtë letër, Lleshi fokusohet te protesta e fundit në Durrës, për ndotjen serioze që shkakton djegia e mbeturinave.
Në përgjigje të shqetësimeve të banorëve, zëvendës ministri kërkon nga Policia e Shtetit të marrë masa urgjente dhe të mbajë nën kontroll situatën duke bashkëpunuar me institucionet vendore.
Qytetet më problematike në këtë drejtim, Lleshit janë Durrësi, Vlora, Kukësi, Tirana dhe Dibra.
LETRA E PLOTË
I nderuar Z. Drejtor,
Siç jeni në dijeni, ditët e fundit është shtuar problematika lidhur me djegien e mbeturinave në vende të hapura pranë qendrave të banuara, si dhe në landfille, duke u kthyer kështu në një rrezik serioz për shëndetin e banorëve pranë tyre. Informacionet e fundit tregojnë se Qarqet më problematike janë ato të Durrësit, Vlorës, Kukësit, Tiranës dhe Dibrës.
Nisur nga sa më sipër, kërkoj që strukturat vendore të Policisë së Shtetit të marrin masa urgjente për të mbajtur nën kontroll situatën në të gjithë territorin e vendit. Për këtë, ato të bashkëpunojnë ngushtë me strukturat përgjegjëse në Prefektura, Bashki, Njësi Administrative, si dhe me ato të Ministrisë së Turizmit dhe Mjedisit, me qëllim ndalimin e zjarreve në landfille dhe vende të hapura publike. Po ashtu, strukturat e Policisë të komunikojnë edhe me kompanitë e kontraktuara për pastrimin e qyteteve/njësive vendore, për t’i dhënë fund një fenomeni të tillë të rrezikshëm.
Sa më sipër, kërkoj nga Policia e Shtetit raportime të veçanta ditore për këtë çështje.
