Sekretari për Aksionin Qytetar në PD dhe deputeti i ardhshëm, Ervin Salianji u shpreh se ministrat teknikë të propozuar nga PD si pjesë e marrëveshjes Rama-
Basha të 18 majit nuk arritën të ndalonin shitblerjen e votës.
Ai komentoi zgjedhjet e 25 qershorit dhe humbjen e thellë të PD dhe tha se në disa zona janë paguar edhe 200 euro për votë.
“Jemi në një proces dhe është evidente që ne kemi humbur. Dua të theksoj se ministrat teknikë nuk kishin kompetenca të gjera dhe nuk arritën të ndalonin shitblerjen e votës. Duhet t’i jepet fund problemit të intimidimit të votës. Shitblerja e votës ishte një fenomen masiv. Në disa zona ka pasur edhe 200 euro për votë. Në Tiranë është arrestuar një zonjë që fotografoi votën pasi donte tja tregonte atij që do i jepte lekët, por ky i fundit nuk është arrestuar. Në Korçë ka pasur dhunim të mbështetësve të PD dhe të gjitha janë me fakte. Në këto zgjedhje duhet të ishe bandit” –tha Salianji.
Ervin Salianji komentoi edhe pjesëmarrjen e ulët në votime, ku sipas tij përkrahësit e PD janë kërcënuar me hiqje nga puna.
