Reperi Arkimed Lushaj ka hequr dorë nga ankimimi i vendimit të Shkallës së Parë të Tiranës, që caktoi masën e “arrestit me burg” për “armëmbajtje pa leje”.
Dje ishte paracaktuar të zhvillohej seanca për shqyrtimin e ankimimit në Gjykatën e Apelit në orën 09:45, mirëpo, avokati i tij, Marash Ibraj, hoqi dorë nga kërkesa për lirim, duke dhënë pak detaje. Ibraj tha se Lushaj nuk besonte te drejtësia. Ndërkohë, është i ati i Arkimedit, Sali Lushaj ai që ka sqaruar përse erdhi ky vendim i Stresit.
Sipas tij, tërheqja kishte ardhur për shkak të shortit, duke akuzuar gjyqtaren si militante të majtë.
Në një postim në “Facebook”, Lushaj shkruan se tërheqja nga ankimimi në Apel i masës së sigurisë ka ardhur pasi gjyqtarja e çështjes është “gjyqtare e devotshme dhe e zellshme e partisë në pushtet”.
“E pamë të udhës dhe më të drejtë të mos dalë një i persekutuar politik përpara kësaj gjyqtareje militante të partisë, duke mos pasur pikën e besimit në dhënien e drejtësisë për Stresin. Dua t’ju bëj me dije se gjithë ajo bujë e madhe si organizator dhe si drejtues e si janë mësuar këta etërit e tyre në emër të popullit është shfryrë dhe nuk po dinë si të bëjnë. Askënd deri më sot nuk po mund ta bëjnë të dëshmojë kundër Stresit”, shkruan ai më tej.
