Sali Berisha ka akuzuar Ramën se po përçmon shqiptarët e veriut duke përdorur postin e tij.
Gjithashtu, ish kryeministri e ka ftuar Ramën që të dalë në dritare më 13 maj dhe të shohë protestën madhështore të opozitës, duke i thënë se “cadra do t’i duket Everest”.
“Për 4 vite ka investuar në rrethet e Veriut më pak se në një bashki. U them Edi Ramës mos mendo të shkelësh virtytin e veriorëve! Vetëm tek ti gjejnë strehë horrat nga veriu, jugu, lindja dhe mbarë Shqipëria. Ti je i vetmi dhe as Enveri s’e bënte dot këtë. Ti përçmon Veriun për dialektin e tij të mrekullueshëm. Më duhet të them një fjalë: çdo shqiptar nga jugu, veriu, lindja, kudo që të jetë: duhet të jetë krenar me atë shqipe që i mëson nëna e tij. Dhe atij mund t’i përqeshë dialektin vetëm ai që nuk është shqiptar. Unë të them një gjë: mos i përçmo, mos përdor postin për t’i fyer dhe përçmuar qytetarët e vendit, ngado që janë sepse gjëja më e thjeshtë është të të japim atë që meriton në jo më pak se gjysmë ore.
Së fundmi, Edvin ke marrë përsipër aktin më makabër në historinë e lirisë së shqiptarëve. Ke marrë përsipër të bëhesh varrmihës i pluralizmit politik. Të bëj thirrje hiq dorë sa më parë nga kjo sipërmarrje. Nuk kanë lind ata që mund të varrosin lirinë politike të shqiptarëve. Të ftoj të rrish në atë dritare më 13 maj, të ftoj të rrish në atë dritare dhe të garantoj që ne protestën e kemi paqësore, por Edvin çadra do të duket Everest! Atëherë do të shohësh ti se cila është çadra, por aty të rrish se ne jemi të vendosur në protestën tonë paqësore.
Ftoj shqiptarët nga Kosova, Maqedonia, Mali i Zi, Diaspora, në protestë për mbrojtje të votës së lirë!”/ TIRANA TODAY
