Mohamed Salah ka fituar zemrat e të gjithë tifozëve të futbollit, me klasin, elegancën dhe thjeshtësinë që ai luan futboll. Ky ka qenë një sezon i jashtëzakonshëm për egjiptianin, i cili si fillim dërgoi kombëtaren e tij në finalet e Botërorit dhe më pas me Liverpool arrin në finalen e Champions League. Të mos mjaftonin këto statistikat e tij këtë sezon me klubin e Premier Leagues janë vërtetë monstruoze, 44 gola në këtë sezon, 10 prej të cilëve në Champions League. Fitorja ndaj Real Madrid në Kiev do të ishte “qershia mbi tortë” për sezonin e artë të Mohamed Salah. Ai beson se ata Liverpool ka një skuadër që të gjithë janë miq të mirë dhe nën moton, të gjithë për një dhe një për të gjithë do t’ia dalim edhe në finale.
“Të luash në finalen e Champions është një ëndërr që bëhet realitet dhe ta fitosh do të ishte një arritje e jashtëzakonshme, – tha egjiptiani për UEFA.com. – Real Madrid ka shumë përvojë, por është një ndeshje finale dhe e kaluara nuk ka të bëj. Luajmë 11 kundër 11, te Liverpool jemi të gjithë shokë dhe Klopp është shok me të gjithë ne.”
“Nuk e di se çfarë do të thotë të fitosh Champions League, sepse tjetër gjë është të luash në finale dhe tjetër gjë është ta fitosh. Do të ishte arritja më e madhe. Të gjithë janë entuziast. Mbaj mend që dy vjet më parë isha në Egjipt me pushime dhe atje të gjithë po shikonin finalen e Champions dhe atmosfera ishte e jashtëzakonshme, edhe pse ajo ndeshje nuk kishte të bënte fare me ta,” – vazhdoi Salah.
Në lidhje me golat e tij, të cilët kanë qenë mbi çdo parashikim në këtë sezon, sulmuesi i ardhur nga Roma, shtoi: “Puna e fortë në stërvitje ka qenë çelësi i gjithçkaje. Kryesorja është që të qëndrojë në këto nivele edhe vitin e ardhshëm. Tani po mendoj vetëm për finalen e madhe. Në Romë bëra dy sezone me nivel dhe nisa të besoja te vetja ime. Kërkova të shkoja në Angli sepse e dija që do të isha i suksesshëm dhe fatmirësisht ia dola në sezonin e parë.”
Salah mund të bazohet edhe te forma e mirë e kolegëve në sulm, Firmino dhe Mane: “Kryesorja për ne është të ndihmojmë skuadrën të fitojë, ka pak rëndësi se cili shënon, kryesorja është që në fund të marrim kupën. Mentaliteti ynë është një për të gjithë, të gjithë për një. Unë kam bërë dhjetë gola në Champions, Mane nëntë gola, Firmino dhjetë. Kjo tregon se kemi merita të barabarta në rrugën drejt suksesit.”
Teksa thotë se momenti i tij i preferuar në këtë sezon ka qenë goli në fushën e Manchester City, sulmuesi afrikan zbulon edhe idhujt e fëmijërisë: “Totti, braziliani Ronaldo dhe Zidane. Ata që unë kam adhuruar ishin krejtësisht ndryshe nga të tjerët në mënyrën si luanin futboll.”
