Ish-ministri i Brendshëm, Saimir Tahiri paraqiti sot para medies dokumentin e Prokurorisë së Katanias, ku thuhej se ajo nuk ka nisur asnjë hetim ndaj tij.
Teksa pyeti publikisht prokurorinë e Krimeve të Rënda përse nuk e kishte bërë një verifikim të tillë, Tahiri paraqet edhe kërkesën që i ka bërë asaj.
Deputeti u shpreh se nuk kishte asnjë orë kohë për të humbur, dhe se i kishte kërkuar që të niste hetimet intensivisht në mënyrë që të zbardhej e vërteta sa më shpejt.
FJALA E TAHIRIT:
I kam kërkuar prokurorisë të zhvillojë intensivisht hetimin tim, unë nuk kam asnjë orë për të humbur. Unë do bëj gjithçka që kjo histori mos të ngecet në kanalet e ndryshkura të historisë. Nuk do humbas asnjë ditë kohë.
Jam i gatshëm të hetohem, nuk i kërkoj asnjë nder askujt, nqs ka deputetë që besojnë se duhet të arrestohem, i ftoj ta bëjnë këtë.
Mua me PS-në më bashkon vetëm e vërteta dhe vetëm përpjekja për ta bërë këtë vend më të mirë. As qëllimi për të mbrojtur njëri-tjetrin në çastin kur dikush shkel ligjin.
S’kam kërkuar mbrojtje nga askush, unë nuk dua mbrojtje fare nga askush. S’dua të dal në këtë histori si njeriu që ia hodhi burgut, dua të përballem si njeriu që përballem me kokën lart. Jam i gatshëm të përballem me çdo pasojë.
Deputetët e PS jam i bindur që do mbajnë një qëndrim, që është mbrojtja e së vërtetës.
Këtë dokument që unë e gjeta për 48 orë, prokuroria e Katanias nuk ka gjetur asnjë motiv për të filluar hetimet ndaj meje. Po si mundet që prokuroria shqiptare të nisë hetimet duke u nisur nga një përgjim? Ku është parë kjo që të të thonë që futu një herë në burg pastaj të gjejmë provat./ Tirana Today
