Kreu i Partisë Socialiste në Tiranë ka takuar sot banorët e Unazës së Re. Gjatë fjalës së tij, ish-ministri i Brendshëm thumboi ish-kreun e LSI-së, Ilir Metën teksa tha se kjo forcë politike ka pasur hapësirën e nevojshme për 4 vjet me radhë, por ka dëshmuar se ka vetëm hallin e familjes së saj dhe jo të popullit shqiptar.
“Partia Socialiste është alternativa e vetme në 25 qershor. Një eksperiencë si ajo e Ilir Metës nuk do doja kurrë ta kisha. I kemi dhënë LSI-së për 4 vjet hapësirën për të treguar se mund të bënte ndryshe. I kemi dhënë mundësinë LSI-së të tregonte se ka hallin e njerëzve, jo hallin e familjes. E fatkeqësisht kjo nuk ndodhi, ndaj ne shkojmë vetëm në zgjedhje. Kjo është arsyeja pse PS nuk do të fitojë sërish me ‘partiçka’”, deklaroi Tahiri.
Gjithashtu, Tahiri akuzoi edhe PD-në, teksa tha se “Luli e Saliu duan të legalizojnë partinë e vet”:
“Nuk jemi njëlloj, nuk janë njëlloj ata që punojnë me ata që nuk punojnë. Luli e Saliu duan të legalizojnë partinë e vet, ne duam të legalizojmë çdo shtëpi të shqiptarëve”.
Tahiri ka qenë një ndër zërat më të fortë kundër LSI-së, po ashtu më i shigjetuari nga kjo forcë politike.
