Ipeshkvi i Dioqezës së Rrëshenit, Dom Gjergj Meta, ka shprehur dhimbjen për humbjen e Xhontil Bardhit, një prej vëllezërve që u ekzekutuan një natë më parë në Krujë. Mbrëmjen e djeshme, Shqipëria u trondit nga vrasja e dy vëllezërve në Gramëz të Krujës.
Vëllezërit Gramoz e Xhontil Bardhi të moshës 34 dhe 24 vjeç, u qëlluan me kallashnikov pranë banesës së tyre nga Roland Pula.
Ky i fundit ende nuk është arrestuar nga policia, ndërsa pak kohë pas krimit, makina e tij u gjet e braktisur.
Lidhur me krimin e dyfishtë ka reaguar edhe Dom Gjergj Meta, i cili kishte njohje personale me më të voglin, Xhontilin, një i ri shumë aktiv në aktivitetet e rinisë së krishterë.
“Sa shumë gjana kisha me të thanë sot more Gjon. Por për tash po te them vetëm lamtumirë! E me fal që nuk munda me mbërritë në kohë … Lamtumirë Gjoni i mirë!
Lutju Zotit për ne!”, shkruan Dom Gjergj Meta.
