Maroku mati forcat me Iranin në Botërorin e Rusisë, por në fund buzëqeshën iranianët pas një autogoli në kohën shtesë. Ishte Bouhaddouz që i dha fitoren Iranit pas një 90’ minutëshi të luftuar nga të dyja ekipet. Ndeshja filloi në ritme të larta dhe me aksione të shumta, një ndeshje mjaft e bukur që priteshe të kishte më shumë gola.
Ishte Maroku që e nisi mirë ndeshjen duke rrezikuar portën kundërshtare në disa momente, por është treguar i pasaktë. Por në gjysmën e dytë të pjesës së parë ishte Irani që më në fund u fut në lojë duke prodhuar disa raste të mira për gol që nuk i shfrytëzon siç duhet.
Në pjesën e dytë Irani humbi disi në fushë dhe Maroku fitoi më shumë terren, por që nuk ditën të shfrytëzojnë asnjë nga rastet e krijuara. Shumë punë kishte edhe arbitri i takimit, turku Caker i cili kishte për të menaxhuar një arenë “lufte” me shumë faulle dhe dëmtime që bënë edhe të japë në fund 6 minuta shtesë.
Tre pikë të rëndësishme për Iranin, që megjithëse nuk ka shumë shpresa të avancojë në fazën e nokautit, të paktën e ka të sigurt se nuk do të dalë pa pikë nga ky kompeticion. Ndërkohë ekipi që rrezikon të kthehet në shtëpi tani është Maroku, pasi e presin dy sfida të vështira ndaj Spanjës dhe Portugalisë.
