Ka qenë vetë shefi ekzekutiv Rummenigge që ia ka komunikuar Carlo Ancelottit vendimin për shkarkimin e postit të tij nga trajnerë i Bayern Munich. Ky vendim ka ardhur pas asaj humbje 3-0 në Paris dhe humbjes së optimizmit se skuadra e drejtuar nga tekniku italian do të arrinte të plotësonte objektivat e vendosura nga klubi në fillim të sezonit.
Tekniku 58-vjeçar është shkarkuar sot pas një vendimi të marrë nga shefi ekzekutiv i Bayern Mynchen, Karl-Heinz Rummenigge. Në një prononcim për mediat, drejtuesi i klubit bavarez ka treguar bisedën e bërë me Ancelotti-n.
“Paraqitja e skuadrës tonë që në fillimin e sezonit nuk përmbushi pritshmërinë që kishim nga ajo. Ndeshja në Paris e tregoi qartësisht që ne duhej të arrinim në disa konkluzione, kjo është ajo që unë dhe Hasan Salihamixhiç i thamë Carlo-s sot, në një bashkëbisedim të hapur e serioz duke e informuar për vendimin tonë”, tha ai.
“Unë do të dëshiroja të falënderoja Carlo-n për bashkëpunimin dhe shpreh keqardhjen për rrjedhën e ngjarjeve. Carlo është një miku im dhe do të mbetet i tillë, por ne na u desh të merrnim një vendim profesional në të mirën e Bayern-it. Unë tani pres që skuadra të ketë një zhvillim pozitiv dhe një performancë absolute në mënyrë që të arrijmë objektivat e këtij sezoni”, ishin fjalët e Rummenigge-s.
