Ish-ministri i Drejtësisë, Ylli Manjani, ka komentuar ngjarjen e atentatit ndaj prokurorit Arjan Ndoja. Manjani duke ironizuar, shprehet se Vettingu nuk mjafton në këtë rast.
Pëllumb Muharremi ishte një nga personat që mbeti i plagosur në atentatin tek mbikalimi i Shkozetit. Ai mban disa identitete, dhe është dyshuar për ngjarje të ndryshme kriminale në Durrës dhe jo vetëm. Pavarësisht kësaj, ai lëvizte i lirë pasi akuzat ndaj tij nuk u provuan kurrë.
I forti i Sukthit me pseudonimin “Rrumi” që mban disa emra, vazhdimisht ka qenë në skedat e policisë, i dyshuar për disa vepra penale.
Për ngjarjen, policia arrestoi Redjan Rraja. 34-vjeçari që u zbulua nga gjurmët e gishtërinjve të cilat ndodheshin në syzet që u gjetën në automjetin e atentatorëve, është shprehur se ato syze nuk i ka përdorur kurrë.
Në dëshminë zyrtare theksohet se Rraja, i njohur si ‘Dara’ e Krujës, është shprehur se nuk i njeh personat që mbetën të plagosur në atentat, prokurorin Arjan Ndoja, Landi Muharremin e njohur si “Rrumi” dhe shoferin Andi Maloku.
