Pas debateve të shumta, opozita parlamentare ka vendosur të braktisë Kuvendin.
Kryetari i opozitës, Myslym Murrizi i ftoi deputetët të largohen pasi sipas tij, kryetari i Kuvendit, Gramoz Ruçi, po përpiqet të bëjë diversion në opozitë.
Murrizi tha se jo vetëm sot, por edhe në seancën e kaluar Ruçi nuk i dha fjalën atij, si kryetar grupit demokrat, por Rudina Hajdarit. Ndërkohë që Ruçi iu përgjigj: “Rrugë të mbarë”.
Pjesë nga debati
Myslym Murrizi: Unë dhe kolegët e opozitës nuk jemi këtu nxënës shkolle që të ulemi dhe ngrihemi jashtë rregullores me dëshirën e të qënit padrino të këtij kuvendit, tëndit apo Ramës. Ndaj seancën e parë të erdha në prani të dy kolegëve deputetë në zyrë, që nuk të drejtë të bësh diversion brenda opozitës. Foli kryeministri sa deshi javën e parë, në emër të grupit demokrat, që ka të drejtë që të flasë pas kryeministrit dhe nuk do të merrja një orë kohë, ia dhe fjalën dikujt tjetër, sot tentove ta bësh, që ti nuk më njeh për kryetar grupit, punë e madhe, më njohin 11 deputetët që më kanë zgjedhur.
As unë nuk kam qejf që të jesh aty, por të kanë votuar. Matu kur flet, se nuk të marr leje ty unë. Unë e kam ngritur dorën se sulltani jot më përmendi 6 herë emrin. Po kërkon që të bësh diversion mes nesh. Kthehu me këmbë në tokë, je atje lart, spiker i Kuvendit, arbitër, për të mbajtur radhën, dhe as protektor, as tutor, as kapo apo padrino, të paktën të atyre që kanë zedër. Ti them këto fjalë për respekt të miqësisë prej 20 vitesh. Unë ftoj deputetët e opozitës ta braktisim këtë seancë dhe këta ta vijojnë mbledhjen e partisë
Gramoz Ruçi: Rrugë të mbarë dhe herë tjetër zbatoni etikën dhe rregulloren e Kuvendit. Vazhdojmë. Fjalën e ka Lleshaj.
