Pasi mandati i tij përfundoi në Tiranë, Ambasada e SHBA i ka uruar rrugë të mbarë ambasadorit Donald Lu. Teksa qëndroi për 4 vite në Shqipëri, me misionin e tij, ambasadori Donald Lu do të vijojë karrierën diplomatike si ambasador i Shteteve të Bashkuara të Amerikës në Kirgistan.
Ndërkombëtarët çdo ditë e më shumë i kanë mëshuar faktit se nuk mund të pranojnë më që korrupsioni të degjenerojë dhe të mbajë peng politikëbërjen dhe drejtësinë në Shqipëri.
Vite më parë, vetë ambasadori amerikan, Donald Lu, është shprehur se drejtësia blihet si “mall” nga politikanët dhe të pasurit, ndërsa ata që janë viktimat e këtij sistemi janë të varfrit.
“Korrupsioni në drejtësi jo vetëm që i lejon gjyqtarët dhe politikanët të mbushin xhepat me para të pista; ai po shkatërron jetët e njerëzve normalë të ndershëm”. Ndër komentet e tij që bëri shumë bujë lidhej edhe me faktin se pasuria e krimit dhe e korrupsionit, duket që tek ora e dorës, që te makina, që të vilat, dhe pastaj më tej te llogaritë bankare, te kompanitë e biznesit, etj.
Dekriminalizimi dhe Reforma në Drejtësi, dy kushtet e SHBA dhe BE
Më shumë se sa një vullnet i përbashkët për të miratuar një ligj që do të parandalonte individë me rekorde kriminale në të shkuarën, për t’u bërë pjesë e politikës apo administratës shqiptare, miratimi i tij në Kuvendin e Shqipërisë erdhi si domosdoshmëri e imponuar nga ndërkombëtarët.
Kumbarët e këtij konsensusi, Donald Lu apo Romana Vlahutin, shpesh kanë folur edhe me emra për personat e inkriminuar nga politika.
