Ndryshe nga sa ishte parashikuar më parë se për kalimin në rrugën e Arbrit drejtuesit e automjeteve do të paguanin një tarifë prej 4 eurosh, një tarifë e tillë do të zerohet.
Këtë e ka bërë të ditur kryeministri Edi Rama i cili ka ndërruar mendje mbi këtë aks rrugor, kur dikur theksonte se çdo drejtues automjeti do t’i duhet të paguajë për të.
Rruga e Arbrit, për të cilën është hapur programi për rindërtimin e saj përmes dhënies me koncesion, nuk do të ketë asnjë tarifë për secilin drejtues automjetesh që udhëton në këtë aks rrugor.
Koncesioni për ndërtimin dhe mirëmbajtjen e kësaj rruge do të kapë vlerën e 33,6 mld lekë të reja. Sipas kryeministrit Rama, ofertat do të priten deri në 2 tetor të këtij viti dhe komisioni do të shpallë fituesin brenda 60 ditëve nga data e mbylljes së ofertës.
“Drejt finalizimit një proces i stërzgjatur në vite që do të kurorëzohet, siç është premtuar brenda vjeshtës me nisjen e punimeve. Është çelur dje koncesioni për ndërtimin dhe mirëmbajtjen e rrugës së Arbrit, me një vlerë prej 33,6 mld lekë të reja. Ofertat do të priten deri në dt 2 tetor 2017 dhe komisioni do të shpallë fituesin brenda 60 ditëve nga data e mbylljes së ofertës. Për kalimin me automjet në këtë aks, nuk do t’ju duhet të paguani asnjë tarifë”, shkruan Rama në profilin e tij në Facebook.
