Greqia do të mbyllë për 10 ditë me radhë ishullin e Porosit. Vendimi erdhi pasi gjatë 24 orëve të fundit, në ishull u konfirmuan 13 raste me koronavirus.
Banorët e ishullit duhet të ndjekin disa masa strikte gjatë ditëve në vijim, me qëllim frenimin e përhapjes së koronavirusit.
Sipas autoriteteve, do të mbyllen të gjitha aktivitetet tregtare nga ora 23:00 deri në 07:00 të mëngjesit. Gjithashtu do të mbyllen të gjitha tregjet publike, ndërsa nuk lejohet mbledhja në ambiente publike apo private të më shumë se 9 personave.
Urdhri ndalon uljen në një tavolinë restoranti të më shumë se 4 personave, ndërsa përjashtim bëhet vetëm nëse bëhet fjalë për familjarë të afërt, të cilët mund të ulen deri në 6 persona.
Po ashtu, të gjithë njerëzit duhet të mbajnë maskë në ambientet publike dhe private deri në një urdhër të dytë.
