Kërkesa e Bashkisë së Tiranës për rritjen e çmimit të ujit, ka sjellë pakënaqësi në radhët e këshilltarëve të djathtë.
Teksa nesër do të zhvillohet mbledhja e Këshillit bashkiak të Tiranës, ku pritet miratimi i rritjes së çmimit të ujit, ka reaguar sot kreu i këshilltarëve të Partisë Demokratike në Këshillin Bashkiak të Tiranës, Leonard Olli.
Në një deklaratë për mediat, Olli tha se ky është abuzim i pastër ndërsa apeloi këshilltarët e Partisë Socialiste dhe të forcave të tjera politike që të reflektojnë në dobi dhe në interes të qytetarit dhe jo në interesa të kryebashkiakut.
Ndërkohë, Veliaj iu përgjigj akuzave për rritjen e çmimit, ku tha se brenda 5 viteve të ardhshme Bashkia e Tiranës do u sigurojë qytetarëve ujë 24 orë, gjë që sipas tij, realizohet me një rritje prej 20 lekësh.
Kryebashkiaku u bëri thirrje qytetarëve që të kursejnë ujin, ndërsa ata që shqetësohen për 20-lekëshin, tha që të mbyllin çezmën të paktën 10 sekonda ën ditë për të mos e ndjerë rritjen e çmimit.
“Dua t’i ftoj të gjithë qytetarët të kursejnë ujin e pijshëm, pasi jemi ende në një situatë krize. Duam që brenda 5 viteve, me planin tonë të investimeve, Tirana të ketë ujë 24 orë. Nëse dikush është i shqetësuar për atë 20 lekëshin, mjafton vetëm 10 sekonda të mbylli çezmën. Sikur 10 sekonda të kursejë ujë në ditë, as nuk e ndjen fare në faturë të gjithë diferencën e çmimit. Ama, me çmim sikur të ishim në Bathore, do kemi ujë sikur të ishim në Korçë”, tha Veliaj.
