Viti 2016 rezulton mjaft pozitiv, teksa shënon një rritje me 33% të prodhimeve të agrumeve.
Sipas Institutit të Statistikave, në vitin 2016 janë prodhuar në total rreth 40.000 ton agrume, ndër të cilat nivelin më të lartë e zotëron qarku i Vlorës me 23.379 ton.
Po ashtu, në raport tregohet numri i rrënjëve të pemëve frutore në prodhim gjatë vitit 2016, ku totali llogaritet në 10.575.000 rrënjë.
Viti 2016 rezulton pozitiv edhe për numrin e rrënjëve të ullinjve në prodhim, ku rezulton se ky numër është rritur me 4.9 për qind gjatë 2016, me një total prej 6.643.000 rrënjë në prodhim.
“Numri i rrënjëve të pemëve frutore në prodhim në vitin 2016 është 10.575.000, duke pësuar një rritje me 3,8 %, në krahasim me vitin 2015. Numri i rrënjëve të ullinjve në prodhim në vitin 2016 është 6.643.000 dhe ka pësuar një rritje 4,9 %, në krahasim me vitin 2015. Numri i rrënjëve të agrumeve në prodhim në vitin 2016 është 1.044.000, duke shënuar një rritje 9,8 %, në krahasim me vitin 2015. Sipërfaqja e vreshtave në prodhim është 10, 011 Ha, duke pësuar një rritje me 1,2 %, në krahasim me vitin 2015. Prodhimi i pemëve frutore në vitin 2016 është 261.754 ton dhe u karakterizua nga një rritje prej 7,6 %, krahasuar me 2015”, thuhet në raport.
