Konsumi i birrës ka pësuar rritje në muajt e parë të vitit. Sipas Drejtorisë së Përgjithshme të Doganave, në 5 muajt e parë të vitit, sasia e birrës së hedhur për konsum llogaritet të jetë 23.834 ton.
Kështu, krahasuar me të njëjtën periudhë të vitit të kaluar, birra e konsumuar është rreth 2.284 ton më shumë se e njëjta periudhë e një viti më parë.
Megjithatë, në statistikat e publikuara, nuk specifikohet se sa është sasia e importuar dhe sa është sasia e prodhimit vendas.
Tregu i birrës është ndër më të “lakmuarit” dhe diskutimet për akcizën e birrës në kohën kur diskutohet paketa fiskale janë të ashpra.
Prodhuesit vendas gjithnjë janë ankuar se është krijuar një treg i pandershëm dhe kanë kërkuar vazhdimisht uljen e taksës së akcizës për këtë produkt, me arsyetimin e rritjes së produktit vendas dhe rritjen e punësimit, shkruan Scan Tv.
Aktualisht prodhimi vendas i birrës e ndan tregun ndërmjet katër kompanive kryesore, por një përqindje të lartë në treg zënë edhe birrat e importit, të cilat në jo pak raste janë favorizuar edhe nga niveli më i ulët i akcizës, duke konkurruar bindshëm prodhimin vendas.
