Trazohen ujërat brenda opozitës joparlamentare. Prej 14 janarit opozita dhe mazhoranca janë ulur në tryezën e dialogut sa i takon reformës zgjedhore, ndërkohë ka zëra se pas miratimit të saj vendi do të shkojë në zgjedhje të parakohshme. Burime nga kampi opozitar theksojnë se periudha më e përshtatshme që të mbahen këto zgjedhje është vjeshta e këtij viti dhe për këtë arsye të gjitha paritet politike janë në lëvizje, duke intensifikuar takimet me qytetarët dhe anëtarësitë e tyre. Dje pasdite kryetari i Partisë Demokratike, Lulzim Basha zhvilloi një mbledhje në selinë blu me aleatët e tij, ndërsa gazeta ka mësuar detaje nga ky takim, ku temë kryesore ka qenë reforma zgjedhore dhe koalicionet para zgjedhore. Sipas informacioneve, mësohet se aleatët tradicionalë të Bashës kanë shfaqur rezerva dhe pakënaqësi, sa i takon bashkëpunimit para zgjedhor me PD-në.
Aleatët kërkojnë të dalin në koalicion më vete
Burime nga mbledhja bëjnë me dije se kreu i Partisë Republikane, Fatmir Mediu; kreu i Partisë Agrare Ambientaliste, Agron Duka; kreu i Partisë Bashkimi për të Drejtat e Njeriut, Vangjel Dule dhe kreu i Partisë Demokristiane, Nard Ndoka i kanë propozuar kryedemokratit Lulzim Basha një formule të re për regjistrimin si koalicione në zgjedhje. Më konkretisht, mësohet se partitë e vogla synojnë të grupohen në një koalicion më të vogël brenda koalicionit të madh, të cilat të mund të regjistrohen nën një sigël në mënyrë që të maksimizohet vota. Në këtë kontekst, mësohet se aleatët e kanë mbrojtur tezën e tyre me justifikimin se votat e marra në zgjedhje të ndahen mes partive të vogla dhe nuk i shkojnë partisë më të madhe të koalicionit, siç e parashikon kodi aktual. Megjithatë, sikundër theksuan të njëjtat burime nga mbledhja, të cilën e kanë kërkuar vetë aleatët tradicionalë të Partisë Demokratike, ky propozim është ende në proces diskutimi.
Frikë për vjedhje të votave
Por gazeta ka mësuar se propozimi i kreut të Partisë Republikane, Fatmir Mediu; kreut të Partisë Agrare Ambientaliste, Agron Duka, kreut të Partisë Bashkimi për të Drejtat e Njeriut, Vangjel Dule dhe kreut të Partisë Demokristiane, Nard Ndoka për kryedemokratin Lulzim Basha është një lëvizje strategjike, pasi ata i frikësohen faktit se Partia Demokratike dhe Lëvizja Socialiste për Integrim mund t’iu “vjedhin” votat. Historia ka treguar që në zgjedhje partitë më të humbura dhe që kanë rënë pre e orekseve të partive të mëdha kanë qenë ato të voglat, kështu që edhe aleatët tradicionalë të Bashës janë hedhur në sulm për të mbrojtur votën e tyre, në mënyrë që ajo të mos dalë jashtë tyre dhe t’iu shkojë partive të mëdha, sikundër e parashikon Kodi Zgjedhor. Pra, aleatët tradicionalë të Bashës kërkojnë të dalin në koalicion më vete, ose koalicion brenda koalicionit të mëdha, vetëm e vetëm se nuk ia kanë besën Monika Kryemadhit dhe Lulzim Bashës. Kjo do të thotë se tensionet brenda opozitës joparlamentare janë rritur dhe sidomos ato arrijnë kulmin në kësisoj rastesh, kur vjen puna për mbrojtje apo rrjedhje votash. Sidoqoftë, mbetet për t’u parë në ditët në vijim se çfarë do të ndodhë, duke qenë se edhe tema e reformës zgjedhore pritet të zgjasë deri në 15 mars, kohë kjo që është parashikuar që të votohet paketa e re, ku një nga hapat që do të ndiqet është edhe ndërhyrja në Kodin aktual Zgjedhor. /Gazeta SOT
