Pas nëntë muajsh në qeli dhe i braktisur nga familjarët, Ritvanin e masakrës së Selenicës e ka vizituar vetëm i vëllai. Ritvan Zykajn e kanë braktisur familjarët, por i vëllai ka marrë guximin që ta vizitojë. Pavarësisht se ai është hasur me familjarin e parë, pas shumë muajsh harresë nga ta, duket se atij nuk i ka bërë përshtypje. Si për çudi, madje as nuk i ka kërkuar gjë të vëllait. Ritvan Zykaj vazhdon të qëndrojë pa folur me askënd, dhe pjesën më të madhe të kohës dëgjohet të flasë me veten, raporton ‘ABC News’.
Ndërkohë në Gjykatën e Vlorës, gjyqi ndaj tij po vazhdon. Në seancën e kaluar kishte shkuar vetëm një dëshmitar, fqinji i tij. Ai i kishte kërkuar gjykatës dhe prokurorisë të mos e thërrisnin më, sepse nuk kishte mundësi.
Kurse dëshmitarë të tjerë, që ditën e masakrës ndodheshin aty në Resulaj, janë larguar të gjithë nga fshati. Zykaj po gjykohet për vrasjen e tetë familjarëve të tij, midis tyre edhe dy fëmijë. Ai ka thënë se i vrau, pasi e quanin hajdut të pulave.
