Një punonjës i policisë është dëmtuar në zonën e Sopotit në Delvinë, gjatë një kontrolli të territorit për goditjen e kultivimit të bimëve narkotike.
Sipas njoftimit të Policisë së Shtetit, punonjësi me iniciale B.H është rrëzuar aksidentalisht teksa kontrollonte në këmbë territorin në një terren të pyllëzuar.
I lënduari është dëmtuar në shpatull dhe në kokë, ndërsa është transportuar menjëherë në spitalin e Sarandës për ndihmë mjekësore.
Pas ndihmës së parë të dhënë në spital, polici i lënduar është transportuar me helikopter për ndihmë më të specializuar në Tiranë, ndërsa mësohet se ai ndodhet jashtë rrezikut për jetën.
