Ambasada e Ukrainës në Teheran ka përjashtuar mundësinë e një sulmi terrorist ndaj avionit Boeing-737 që u rrëzua mëngjesin e sotëm në afërsi të aeroportit iranian Imam Khomeini. Ambasada konfirmon paraprakisht se avioni është rrëzuar për shkaqe teknike. Lidhur me zërat që qarkullojnë prej orësh për një sulm terrorist, ky version është përjashtuar.
“Sipas informacionit paraprak, avioni u rrëzua si rezultat i një dështimi të motorit për arsye teknike. Aktualisht, versioni i një sulmi terrorist është përjashtuar”, citohet në faqen e Ministrisë së Jashtme të Ukrainës.
Midis viktimave ishin 82 iranianë, 63 kanadezë, 11 ukrainas përfshirë të gjithë ekuipazhin, 10 suedezë, 4 afganë, 3 britanikë dhe 3 gjermanë, tha Ministri i Jashtëm, Vadym Prystaiko.
Këtë të mërkurë, disa orë pas sulmit iranian mbi bazat raketore amerikane, një avion Boeing 737, me 170 pasagjerë u rrëzua fill pas ngritjes në aeroportin Imam Khomeini në Teheran, Iran.
Përfshirja e avionit nga flakët pas përplasjes, e vështirësoi ndërhyrjen e menjëhershme për shpëtimin e jetëve të viktimave.
