Snajperi që u përdor në ekzekutimin mafioz të Kastriot Reçit, u gjet në pjesën e pasme të pallatit, ku vrasësi ishte strehuar për të kryer ekzekutimin. Ngjarja e rëndë ndodhi në datën 7 janar në Rrëshen. Arma e krimit ishte hedhur në tokë nga autori, pas vrasjes së 47-vjeçarit.
Hetimet
Nga grupi hetimor mësohet se janë fshirë numrat e serisë së armës, ç’ka e vështirëson punën për të gjurmuar origjinën e këtij snajperi. Arma është e pajisur edhe me silenciator dhe dylbi. Në fakt është një pushkë e çmontueshme e përbërë nga dy pjesë.
Snajperi është i një kalibri të lartë, dhe sipas ekspertëve kriminalistë, qitësi ka qenë profesionist. Kjo për shkak edhe të pozicionit dhe distancës së largët nga objektivi, rreth 150 metra në vijë ajrore. Sipas hetuesve, ky lloj snajperi ka saktësi në qitje në një distancë mbi 200 metra dhe goditja konsiderohet vdekjeprurëse.
Për të ekzekutuar 47-vjeçarin Kastriot Reçi, vrasësi ishte fshehur në një banesë në katin e fundit të një pallati. Qitja u krye nga dritarja e banjës së apartamentit, raporton “tvklan.al”. Një hapësirë e vogël, por e mjaftueshme, mes murit dhe dritares, i ofronte snajperistit fushëpamjen e plotë të qendrës së Rrëshenit, pikërisht aty ku po kalonte 47-vjeçari Reçi për të shkuar në lokal.
Goditja ka qenë preçize dhe e saktë. Kastriot Reçi u qëllua me një plumb në zemër dhe mbeti i vrarë menjëherë. Kastriot Reçi u ekzekutua me snajper rreth orës 11:00 të paradites së të martës, teksa po hynte në lokalin e tij në qendër të qytetit të Rrëshenit.
