Ministria e Arsimit ka ashpërsuar rregullat për maturantët që do ti nënshtrohen provimeve gjatë vitit 2020.
Mësohet se për çdo person i cili do të publikojë tezat e provimit do të kërkohet ndjekje penale. Ndërsa për ata nxënës që konstatohen me celularë gjatë provimit, do të përjashtohen nga të gjitha provimet e Maturës Shtetërore. Ata do të kenë mundësi t’i japin vetëm pas një viti, duke djegur kështu edhe opsionin e ‘vjeshtës’.
Gjithashtu nëse konstatohet se maturanti ndërron vendin gjatë zhvillimit të provimit, ai/ajo do të përjashtohet nga provimi. Edhe nëse maturantët do të kapen duke komunikuar me nxënësit e tjerë, ata do të përjashtohen nga provimi.
Sa i përket administratorëve, nëse ata publikojnë tezat do të rrezikojnë largimin nga puna. Po ashtu, për çdo person të tretë që publikon provimet, do të kërkohet ndjekje penale nga Drejtoria e Përgjithshme e Arsimit Parauniversitar.
Sipas rregullores së re, nga 20% të pikëve që ishte vitin e kaluar, këtë vit maturantët duhet të marrin jo më pak se 25%. As këtë vit nuk do të ketë rivlerësim të testit, ndërsa rezultatet e provimit duhet të shpallen jo më vonë se data 30 qershor.
Të gjitha këtë rregulla janë miratuar në rregulloren e re të Maturës Shtetërore 2020, nga Ministrja e Arsimit, Besa Shahini.
